Japanski milljarðamæringurinn Yusaku Maezawa, 44 ára, leitar nú að konu til að eyða lífinu með. Nýlega slitnaði upp úr sambandi hans og 27 ára unnustu hans. Ef honum tekst að finna nýja unnustu ætlar hann að bjóða henni með sér í hringferð um tunglið eftir þrjú ár en hann, og unnustan væntanlega, verða fyrstu farþegar SpaceX fyrirtækis Elon Musk.

Leit hans að ástinni verður tekin upp en verið er að gera heimildamyndaþáttaröð, sem ber heitið „Full Moon Lovers“, um leit hans að hinni einu sönnu ást. Hún verður sýnd hjá Abema TV efnisveitunni.

„Um leið og ég finn meira og meira fyrir einmanaleika og tómleika er einn hlutur sem ég hef hugsað mér að gera: að halda áfram að elska konu.“

Skrifar milljarðamæringurinn á heimasíðu þar sem áhugasamar konur geta skráð sig í þáttinn.

Umsækjendur verða að hafa áhuga á að fara til tunglsins og að taka þátt í nauðsynlegum undirbúningi fyrir ferðina. Þeir verða einnig að elska lífið, vilja frið í heiminum, vera gáfaðir og jákvæðir. Og auðvitað einhleypir.

Umsóknarfrestur rennur út 17. janúar.