Þetta eru niðurstöður nýrrar pólskrar rannsóknar sem rúmlega 500 karlar og konur tóku þátt í. Í fyrsta hluta rannsóknarinnar var rætt við 163 ungar konur. Brjóstastærð þeirra var mæld og kynlífshegðun þeirra skráð til að sjá hvort tengsl væru þarna á milli. Niðurstaðan var að engin tengsl voru á milli þess að vera með stór brjóst og tíðni skyndikynna eða mikils magns kynhormónanna testósteróns og estradíóls en bæði hormónin geta haft áhrif á kynhvöt fólks.
Í öðrum hluta rannsóknarinnar voru 500 karlar og konur látin dæma myndir af konum með mismunandi stór brjóst. Niðurstaðan var að bæði kynin töldu að konur með stór brjóst væru með meiri kynhvöt og væru lauslátari en þær brjóstaminni. Einnig taldi fólkið að konurnar væru frjósamari og betri til að framleiða mjólk. Fólkið taldi einnig að brjóstastóru konurnar væru líklegri til að halda framhjá og væru ekki eins greindar og konur með lítil eða meðalstór brjóst. Í heildina var það mat fólksins að barmstórar konur væru betri til að eiga í skammtímasamböndum. Stór brjóst þóttu þó ekki meira aðlaðandi eiginleiki í fari kvenna. Lítil brjóst voru einu brjóstin sem þóttu síður aðlaðandi.
Vísindamennirnir reyndu að koma með skýringar á af hverju fólk telur að konur með stór brjóst séu með meiri kynhvöt og séu lauslátari en aðrar konur. Ein af skýringum þeirra er að fólk fái þessar hugmyndir úr klámmyndum því konur í þeim séu oft með brjóst yfir meðallagi.
Þeir komust einnig að þeirri niðurstöðu að konur með stór brjóst séu ekki lauslátar og að karlar sem eru að leita eftir skyndikynnum ættu að muna að þótt að kona sé með stór brjóst þýði það ekki endilega að hún vilji hoppa í bólið með þeim.
