Fram að þessu hafa vísindamenn verið þeirrar skoðunar að svarthol, sem myndast úr stjörnu, geti aðeins haft ákveðið mikinn massa. En nú þarf að endurskoða þetta eftir magnaða uppgötvun stjörnufræðinga.

Þetta kemur fram í fréttatilkynningu frá Chinese Acadeym of Sciences. Fram að þessu hefur verið talið að massi svarthola, sem myndast þegar stórar stjörnur hrynja saman í Vetrarbrautinni, geti aðeins verið tuttugu sinnum meiri en massi sólarinnar. Talið er að um 100 milljónir svarthola séu í Vetrarbrautinni.

En kínversku vísindamennirnir telja sig nú hafa fundið svarthol sem er með 70 faldan massa sólarinnar. Þetta risastóra svarthol hefur fengið heitið LB-1 en það er í um 15.000 ljósára fjarlægð frá jörðinni.

Í fréttatilkynningunni kemur fram að vísindamennirnir hafi sjálfir verið vantrúaðir á það sem þeir uppgötvuðu.

„Svarthol af þessari stærð ættu ekki að geta verið til í Vetrarbrautinni miðað við núverandi reiknilíkön af þróun stjarna. Við héldum að lofttegundir mjög massamikilla stjarna, með hefðbundna kemíska uppbyggingu, í Vetrarbrautinni myndu dreifast með stjörnuvindum þegar stjörnunar nálgast skapadægur sín. Af þeim sökum ættu þær ekki að skilja svona mikið eftir sig. LB-1 er tvisvar sinnum massameiri en við töldum mögulegt. Nú verða vísindamenn að takast á við þessa áskorun og útskýra tilurð þess.“

Segir Liu Jifeng prófessor við kínversku stjörnuathugunarmiðstöðina.

Eitt það helsta sem einkennir svarthol er að þau eru frekar lítil í umfangi en gríðarlega massamikil og þyngdarafl þeirra er svo mikið að ekkert sleppur frá þeim, ekki einu sinni ljós.