Í síðustu viku skýrðu kínversk yfirvöld frá því að tveir hljóti nú meðferð vegna svartadauðasmits. Fólkið býr í Mongólíu en í maí létust karl og kona þar af völdum svartadauða eftir að hafa borðað hrátt nýra úr múrmeldýri en samkvæmt gamalli trú er það margra kvilla bót að éta hrátt nýra úr múrmeldýrum.

Svartdauði er hættulegur smitsjúkdómur sem varð mörgum að bana á öldum áður. Sjúklingarnir fá nú læknismeðferð í Peking. Svartidauði, sem er af völdum baktería, smitast með flóabitum og með sýktum dýrum. Ef smit er ekki meðhöndlað deyr fólk að sögn Alþjóðaheilbrigðismálastofnunarinnar.

Talið er að 50 milljónir Evrópubúa hafi látist af völdum svartadauða á miðöldum. Frá 2010 til 2015 greindust um 3.300 tilfelli af sjúkdómnum um allan heim. 584 létust af hans völdum. Flest voru tilfellin í Lýðstjórnarlýðveldinu Kongó, Madagaskar og Perú.

Á undanförnum 20 árum hafa tæplega 50.000 manns greinst með svartadauða og flokkar Alþjóðaheilbrigðismálastofnunin sjúkdóminn nú sem sjúkdóm sem er á uppleið.