Ein heitasta piparjónka landsins, áhrifavaldurinn Sunneva Eir Einarsdóttir, er gengin út ef marka má nýjustu fregnir. Sá heppni heitir Benedikt Bjarnason og er sonur fjármálaráðherra. Ástarblossinn er tiltölulega nýkviknaður og því lék DV forvitni á að vita hvernig þau Sunneva og Benedikt eiga saman ef lesið er í stjörnumerkin.

Sunneva er ljón en Benedikt er vatnsberi. Þau eru bæði mjög kappsmikil og því einkennir mikil orka og metnaður þetta samband. Þau eiga það til að fara í aðeins of mikla samkeppni við hvort annað sem gæti orðið til þess að sambandið bíður hnekki en hins vegar er aldrei leiðinlegt í kringum par ljóns og vatnsbera.

Þau eru bæði nýjungagjörn og adrenalínafíklar sem skora á hvort annað í alls kyns ævintýri. Það gefur sambandinu mikið skemmtanagildi, þótt stundum gleymist að horfa aðeins á dýptina. Bæði ljón og vatnsberi hafa mikla þörf fyrir að láta dá sig og dýrka og getur það stundum farið út í öfgar. Ljónið getur hins vegar virkað vel fyrir vatnsberann því þótt hann fái fullt af hugmyndum er hann ragur við að framkvæma þær. Ljónið hefur hins vegar mikið framkvæmdavit og þor.

Bæði merkin þrá að vera sjálfstæð og það er mikilvægt að þau virði það sem skilur þau að. Ljónið getur verið of dramatískt fyrir vatnsberann en vatnsberinn getur líka virkað of óstöðugur fyrir ljónið. Ef þau tala saman um hvað þau virkilega vilja, gera skýra verkaskiptingu á heimilinu og virða hvort annað þá getur þetta samband orðið einstaklega ástríðufullt, öruggt og gott.

Sunneva Einars
Fædd: 7. ágúst 1996
Ljón

-hugmyndarík
-ástríðufull
-örlát
-fyndin
-hrokafull
-þrjósk

Benedikt
Fæddur: 11. febrúar 1998
Vatnsberi

-sjálfstæður
-mannvinur
-samkvæmur sjálfum sér
-framsækinn
-tilfinningalega lokaður
-fjarlægur