Alræmdasta sakamál Íslandssögunnar, Guðmundar- og Geirfinnsmálið, er kvikmyndagerðarmönnum sérstaklega hugleikið um þessar mundir.

Annars vegar var ný bresk-íslensk heimildamynd um Guðmundar- og Geirfinnsmálið heimsfrumsýnd í Kanada í síðustu viku og hins vegar vinnur RVK Studios, framleiðslufyrirtæki Baltasars Kormáks, að sjónvarpsþáttaröð á ensku um málið. Bæði verkefnin eru innblásin af útvarpsþáttum og umfjöllun Simon Cox um málið fyrir BBC, en þættir hans nefndust The Reykjavík Confessions.

Heimildamyndin Out of thin air er framleidd af Sagafilm og breska fyrirtækinu Mosaic Films fyrir RÚV, BBC og Netflix. Bretinn Dylan Howitt er leikstjóri myndarinnar og er hún bæði unnin upp úr gömlu myndefni sem nýjum atriðum sem leikstýrt er af Óskari Jónassyni. Ólafur Arnalds gerir tónlist myndarinnar. Gagnrýnandi kanadíska kvikmyndavefsins Toronto Film Scene hrósar myndinni, segir hana snjalla þótt hún sé lengi framan af torskilin og flókin.

Sjónvarpsserían um málið verður hins vegar unnin af framleiðslufyrirtækjunum Buccaneer Media og RVK Studios, en handritið verður skrifað af John Brownlow og áðurnefndum dagskrárgerðarmanni BBC, Simon Cox. Í viðtali við Vísi á dögunum sagði Baltasar Kormákur að hann hefði áhuga á að leikstýra þáttunum en teldi það ólíklegt vegna anna. Hann telur enn fremur líklegt að tökur hefjist á næsta ári.