Gunnlaugur K. Jónsson, forseti NLFÍ og Heilsustofnunar í Hveragerði (áður nefnt Heilsuhælið í Hveragerði) var árið 2018 með 1,2 milljónir króna á mánuði fyrir störf sín hjá stofnuninni. Þessar tekjur hafði hann ofan á fast starf sitt sem aðstoðaryfirlögregluþjónn hjá lögreglunni á höfuðborgarsvæðinu. Þetta kemur fram í úttekt Stundarinnar á nokkrum málum stofnunarinnar. Kemur fram að tekjur Gunnlaugs af störfum fyrir NLFÍ tvöfölduðust milli ára. Er um að ræða laun fyrir stjórnarsetu og síðan sérverkefni.
Nokkur atriði í umfjöllun Stundarinnar vekja athygli og spurningar. Til dæmis það að enginn starfandi geðlæknir er núna hjá stofnuninni en samt er geðendurhæfing eitt af þeim verkefnum sem getið er um í nýjum 875 milljóna króna samningi hennar við Sjúkratryggingar Íslands.
Aðalefni greinarinnar er skyndileg brottvikning forstjóra stofnunarinnar í vor, Haraldar Erlendssonar, en hann var kallaður fyrirvaralaust á fund og látinn skrifa undir starfslokasamning. Forstjórinn var talinn ekki deila sömu framtíðarsýn og stjórnarformaðuinn og forseti NLFÍ, Gunnlaugur. Félagið var stofnað árið 1955 á grunni náttúrulækninga en hefur farið út á svið hefðbundinna lækninga á seinni áratugum. Sagt er að Gunnlaugur og þeir sem með völdin fara í félaginu vilji leggja áherslu á heilsuhótel og heilsulindir (spa). Ljóst er þó að hefðbundnar lækningar eru grundvöllur samninga við Sjúkratryggingar Íslands sem nema hátt í milljarði á ári. Ekki virðist liggja fyrir skýr framtíðarstefna félagsins.
