Úrslitaleikur Evrópudeildarinnar fór fram í gær en grannalið Arsenal og Chelsea áttust við í Baku. Fyrri hálfleikurinn í gær var engin frábær skemmtun og fengum við engin mörk.

Það fór allt af stað í seinni hálfleik og komst Chelsea yfir með laglegu skallamarki Olivier Giroud. Stuttu seinna var staðan orðin 2-0 fyrir þeim bláu en Pedro skoraði þá laglegt mark eftir skyndisókn. Eden Hazard skoraði svo þriðja mark Chelsea ekki löngu síðar úr vítaspyrnu og útlitið svart fyrir Arsenal. Alex Iwobi lagaði stöðuna fyrir Arsenal með frábæru marki áður en Hazard bætti við sínu öðru og gulltryggði Chelsea 4-1 sigur.

Arsenal mun því leika í Evrópudeildinni á næstu leiktíð eftir að hafa hafnað í fimmta sæti úrvalsdeildarinnar.

Eiður Smári Guðjohnsen, var sérfræðingur BT Sport á leiknum ásamt Cesc Fabregas, báðir léku með Chelsea en Fabregas var einnig leikmaður Arsenal. Það vakti athygli í gær að Gary Cahill, fyrirliði Chelsea var að kveðja félagið, en fékk ekki að spila síðustu mínúturnar.

,,Hann hefur þjónað félaginu frábærlega, það hefði verið fallegt að gefa honum fimm mínútur. Láta hann fá armbandið, ég saknaði þessi,“ sagði Fabregas.

Eiður Smári tók í sama streng. ,,Ég er ekki viss um að það hafi komið upp í huga Maurizio Sarri. Hann er svo einbeittur sem þjálfari, fólkið í kringum hann hefði átt að láta vita, gefa honum þá virðingu sem hann á skilið.“