Össur Skarphéðinsson, fyrrverandi utanríkisráðherra Samfylkingarinnar, tekur upp hanskann fyrir Áslaugu Örnu Sigurbjörnsdóttur, þingmann Sjálfstæðisflokksins og formann utanríkismálanefndar, á Facebook í kvöld. Áslaug, sem tók til máls um þriðja orkupakkann í umræðum um störf þingsins í dag, sagði það ekki koma sér á óvart að eftir því sem fólk kynnti sér málið betur, fjölgaði þeim er væru jákvæðir í garð orkupakkans, líkt og skoðanakönnun Fréttablaðsins hefði leitt í ljós.

Áslaug fékk bágt fyrir þessi ummæli sín í umræðuhópnum Orkan okkar, þar sem andstæðingar þriðja orkupakkans koma gjarnan saman. Hefur hópurinn einnig verið gagnrýndur fyrir ritskoðun og að útiloka þá sem eru á öndverðum meiði.

Össur kom hinsvegar Áslaugu til varnar í kvöld, er honum blöskraði ummælin sem látin voru falla í hennar garð:

„Ung og áreiðanlega efnileg þingkona leyfði sér að hafa skoðanir á orkupakkaræflinum á þingi undir dagskrárlið sem Þráinn Bertelsson kallaði einu sinni “hálftími fyrir hálfvita.” Af tilviljun horfði ég á ræðuna. Hún var flutt af kurteisi sem ég náði því miður aldrei að tileinka mér. Í kjölfarið slæddist ég inn á “Orkan okkar” þar sem einhver vitsmunavera hafði deilt frétt af ræðunni. Það var lífreynsla.

Einkunnirnar sem henni voru gefnar af hinum málefnalegu andstæðingum orkupakkaræfilsins voru meðal annars þessar: Dramb, hroki, landráðafólk, ómerkileg, ósmekkleg, forhert, ræningjar, grey, skítalykt, skítadreifarar, “greyið stígur ekki i vitið”, lygi, lágkúra, og kona kallar kynsystur sína “litlu stelpuna sem talar einsog henni er sagt að gera”.