Nýjasta kvikmynd M. Night Shyamalan, Split, var vinsælasta bíómyndin í kvikmyndahúsum í Bandaríkjunum um helgina. Split situr á toppnum þriðju vikuna í röð.

Myndin hefur fengið ágætis dóma hjá kvikmyndagagnrýnendum og þykir Shyamalan að einhverju leyti hafa náð vopnum sínum eftir mögur ár. Hann sló fyrst í gegn árið 1999 með mynd sinni The Sixth Sense.

Myndin hefur nú verið þrjár vikur í sýningu og hefur hún á þeim tíma halað inn tæplega 100 milljónir Bandaríkjadala sem þykir dágott, enda var myndin ekki ýkja dýr í framleiðslu.

Í öðru sæti yfir vinsælustu bíómyndir helgarinnar var hryllingsmyndin Rings. Um er að ræða framhald á hrollvekjunni vinsælu, The Ring, sem kom út árið 2002.