Rússneski tónlistarspekúlantinn Darya Ostryakova fer fögrum orðum um hljómsveitina Hatara og framlag Íslands í Eurovison, Hatrið mun sigra, í nýju myndbandi á YouTube-rás sinni.

„Þeir björguðu Eurovision,“ segir Darya meðal annars um Hatara, en hún er mjög hrifin af iðnaðarrokki. Á einum tímapunkti á hún vart til orð yfir frammistöðu hljómsveitarinnar. „Ég er svo glöð,“ segir hún. „Búningarnir eru æði. Ég elska hljómsveitir sem brydda upp á öðruvísi búningum.“

Þá segir Darya að Hatari gæti vel unnið keppnina, en að það velti allt á hvernig áhorfendur taka þeim.

„Ég held að flestir muni ekki falla fyrir þessu í Eurovision,“ segir hún. „En þeir eru áhugaverðir,“ bætir hún við. „Þeir eru svalir. Þeir eru uppáhaldið mitt, þó þeir vinni ekki.“

Það má með sanni segja að tilfinningarnar beri Daryu oft ofurliði í myndbandinu.

„Þetta er eins og smyrsl fyrir sálina,“ segir hún. „Ég get ekki haldið aftur af tilfinningum mínum því mér finnst þeir svo frábærir.“

Í lokin má heyra að Darya er orðin sannkallaður Íslandsvinur.

„Takk Ísland fyrir rokkið.“