Síðasta sumar var 10 ára stúlka á gangi með fjölskylduhundinn í Heather Glen Court í Woodbridge i Virginíu í Bandaríkjunum. Þetta var síðdegis á föstudegi og veðrið var gott. Mikið var af fólki á ferðinni, fólk á leið heim úr vinnu og börn að koma heim úr skóla.

Samkvæmt lögregluskýrslu þá  varð stúlkan vör við að maður gekk á eftir henni í töluverðan tíma. Hún jók því hraðann þegar hún varð vör við að hann dró á hana. Fyrirætlanir hans urðu alveg ljósar þegar hann tók til fótanna í átt að henni og greip um úlnlið hennar.

En af einhverjum ástæðum reiknaði maðurinn ekki með viðbrögðum hundsins. Hann brást illa við og réðst á manninn og beit hann í höndina. Við það neyddist hann til að sleppa takinu á stúlkunni. Hann lagði síðan á flótta og stúlkan komst heim.

Lögreglan gerði mikla leit að manninum en hann fannst ekki og er málið því enn óupplýst.