Þóranna Sigurðardóttir er ein af 25 kvenleikstjórum sem hafa verið valdir til að taka þátt í námskeiði á vegum American Film Institute og Twentieth Century Fox kvikmyndaverinu. Markmiðið með námskeiðinu, sem nefnist AFI Conservatory Directing Workshop for Women, er að auka fjölda kvenleikstjóra sem koma að stórmyndum í Hollywood. Konurnar 25 munu fá tækifæri til að leikstýra stuttmyndum sem byggja á þekktum kvikmyndum eða vörumerkjum í eigu Twentieth Century Fox, svo sem Alien, Die Hard, The Fly, Maze Runner, Planet og the Apes og Predator.

Þóranna hefur starfað í Los Angeles í meira en áratug en vakti sérstaka athygli í fyrra þegar hún leikstýrði tónlistarmyndbandi við lagið Robot Me með einni þekktustu rokkhljómsveit heims, Red Hot Chili Peppers. Áður hefur hún gert stuttmyndina Zelos, sem fjallar um konu sem pantar sér klón. Myndin var sýnd á fjölda kvikmyndahátíða og hlaut þó nokkur verðlaun.