Í lok vikunnar var tilkynnt að fjölmiðlakonan Ingibjörg Þórðardóttir hefði verið ráðin yfirmaður stafræns teymis á heimsvísu hjá CNN. Starfstitill hennar er „Executive Editor, International“ og mun hún stýra meðal annars alþjóðlegum fréttum og íþróttaumfjöllun frá London, Hong Kong, Abu Dhabi, Lagos og New York. Ingibjörg starfaði í um 15 ár hjá BBC áður en hún flutti sig um sett yfir til bandaríska risans árið 2015, þar sem vegur hennar hefur vaxið jafnt og þétt.
Svo skemmtilega vill til að í helgarblaði DV sýnir systir Ingibjargar, Ragnhildur Þórðardóttir, á sér hina hliðina. Ragnhildur, sem er betur þekkt sem Ragga nagli, hefur vakið mikla athygli fyrir hressilega og kjarnyrta pistla um heilsu og mataræði. Þá gaf hún út bókina Heilsubók Röggu nagla fyrir nokkrum árum sem sló í gegn. Ragga býr í Kaupmannahöfn ásamt eiginmanni sínum en hún er klínískur heilsusálfræðingur að mennt en starfar fyrst og fremst sem einkaþjálfari í dag.
