Lestarslys varð á Stórabeltisbrúnni fyrir stundu. Fjölmennt lið lögreglu og sjúkraflutningamanna er á leið á vettvang og eru ökumenn beðnir um að sýna ítrustu tillitssemi og vera ekki fyrir björgunarliðinu og aka ekki í átt að Nyborg eftir Fynske Motorvej. Slysið varð á vestanverðri brúnni.

Dönsku járnbrautirnar, DSB, segja að átta manns hafi slasast þegar lestarstjórinn neyddist til að bremsa skyndilega. Hemlunin var mjög harkaleg. Samkvæmt fréttum danskra fjölmiðla þurfti lestarstjórinn að snögghemla vegna „hlutar“ á lestarteinunum. Óveður er nú í Danmörku og er Stórabeltisbrúin lokuð fyrir bílaumferð vegna þess en lestir mega aka yfir hana.

Uppfært klukkan 07.15

Samkvæmt fréttum danskra fjölmiðla lenti eitthvað á lestinni og virðist hún vera töluvert skemmd miðað við myndir sem farþegar hafa sent fjölmiðlum.

Svo virðist vera sem meiðsl fólksins séu ekki lífshættulegt. Björgunarlið er enn á leið á vettvang en ferðin sækist seint vegna mikillar umferðar og fjölda ökutækja sem hindra för um neyðarakreinar.