Það fór ekki framhjá nokkrum manni að kosið var til Alþingis á laugardag. Eins og venja er skiptust á skin og skúrir hjá frambjóðendum enda er eins manns dauði annars brauð. Stemningin var þó almennt góð á kosningavökum flokkanna, að minnsta kosti hjá Sjálfstæðisflokki og Vinstri grænum en þar leit ljósmyndari DV við á laugardagskvöld. Sjálfstæðisflokkur var ótvíræður sigurvegari kosninganna en árangur VG var einnig góður.
Vinkonur Þóra Margrét Baldvinsdóttir, eiginkona Bjarna Benediktssonar, formanns Sjálfstæðisflokksins, stendur hér við hlið Svanhildar Hólm Valsdóttur, sem er aðstoðarkona Bjarna. Svanhildur er sem kunnugt er eiginkona fjölmiðlamannsins Loga Bergmanns.
Bræðurnir saman Gústaf og Brynjar Níelssynir voru temmilega hressir á kosningavöku Sjálfstæðismanna á Grand Hótel. Gústaf var í framboði fyrir Íslensku þjóðfylkinguna en dró framboð sitt til baka á lokametrunum. Brynjar var hins vegar í framboði fyrir Sjálfstæðisflokk og var kjörinn á þing.
Rýnt í tölur Bjarni Benediktsson, formaður Sjálfstæðisflokksins, hafði ástæðu til að gleðjast á laugardagskvöld. Flokkur hans vann stórsigur í kosningunum. Hér rýnir Bjarni í nýjustu tölur á laugardagskvöld.
Brosmild Söngkonan Sigríður Thorlacius var brosmild á kosningavöku VG. Hún skipaði 19. sætið á lista VG í Reykjavík norður.
Fimma Áslaug Arna Sigurbjörnsdóttir laganemi skipaði 2. sætið á lista Sjálfstæðisflokksins í Reykjavíkurkjördæmi norður. Áslaug Arna mun því setjast á þing í fyrsta sinn.
