Íslenska karlalandsliðið spilaði upp á stoltið í kvöld er strákarnir heimsóttu stórlið Belgíu.

Um var að ræða leik í Þjóðadeildinni en Ísland var fallið um deild fyrir leikinn í kvöld.

Belgar höfðu að lokum betur með tveimur mörkum gegn engu en bæði mörkin komu í síðari hálfleik.

Ísland stóð vaktina vel mest allan leikinn en tvö einstaklingsmistök kostuðu stig að lokum.

Michy Batshuayi var maðurinn sem reyndist of stór biti fyrir Ísland og gerði bæði mörkin í 2-0 sigri.

Hér má sjá einkunnir okkar manna úr leiknum.

Hannes Þór Halldórsson 5
Það var ekki of mikið að gera hjá Hannesi en hann leit ekki sannfærandi út í öðru marki Belga er hann missti knöttinn og skoraði Batshuayi sitt annað mark.

Hörður Björgvin Magnússon 4
Því miður einn slakasti landsleikur Harðar. Margar sendingar sem hittu ekki samherja og var sofandi á verðinum er Belgar skoruðu fyrra markið.

Jón Guðni Fjóluson 6
Alls enginn fastamaður í landsliðinu en leit bara vel út í fjarveru Ragnars Sigurðssonar.

Kári Árnason 7
Kári var besti leikmaður Íslands í kvöld. Það er ekki hægt að efast um hans gæði.

Sverrir Ingi Ingason 6
Sverrir virkaði einnig nokkuð öruggur í sínum málum. Fínasta frammistaða.

Ari Freyr Skúlason 5
Ari átti ekki sinn besta leik en hann hljóp mikið og reyndi.

Guðlaugur Victor Pálsson 6
Maður tekur ekki mikið eftir Victori á velli en hann gerði það sem hann þurfti að gera í kvöld.

Aron Einar Gunnarsson 7
Frábært að sjá Aron koma sterkan inn. Virkaði í flottu standi og bar fyrirliðabandið með prýði.

Albert Guðmundsson 6
Leikmaður sem er alltaf spennandi að horfa á. Oft óútreiknanlegur og reyndi hvað hann gat í kvöld. Kannski við erfiðar aðstæður. Fékk þó besta færi Íslands undir lokin en klikkaði.

Arnór Sigurðsson 6
Fyrsti landsleikur Arnórs kom í kvöld og við klöppum fyrir honum. Enn mjög ungur og á bjarta framtíð fyrir sér.

Arnór Ingvi Traustason 5
Bauð ekki upp á mikið fram á við og við söknuðum Alfreðs. Alfreð meiddist í upphitun og gat ekki spilað.

Varamenn:

Kolbeinn Sigþórsson 5
Sást lítið eftir innkomuna.

Jón Dagur Þorsteinsson –
Spilaði aðeins nokkrar mínútur en þetta var hans fyrsti A-landsleikur sem er gleðiefni.