Hlaðvarpsþátturinn, 90 mínútur hefur hafið göngu sína en um er að ræða þátt sem Hörður Snævar Jónsson, ristjóri 433.is stýrir.

Rætt verður um fótbolta við áhugaverða gesti í vetur, farið verður um víðan völl.

Fyrsti gestur þáttarins er Freyr Alexandersson, aðstoðarþjálfari karlalandsliðsins og fyrrum þjálfari kvennalandsliðsins.

Freyr ræddi framherjann Viðar Örn Kjartansson örstutt en hann ákvað á dögunum að hætta með landsliðinu.

Freyr hefur rætt við Viðar síðan hann tók ákvörðunina en dyrnar eru alls ekki lokaðar ef horft er til framtíðar.

,,Hugurinn hjá honum var fínn, þannig séð. Hann talar um meiðsli sem hann hefur glímt við. Hann hefur verið í lægð hjá félagsliði sínu bæði í Ísrael og núna í Rússlandi,“ sagði Freyr.

,,Við töluðum eiginlega bara um það að hann þyrfti að koma sér á strik aftur. Við vitum það öll sem fylgjumst með fótbolta að Viðar Örn þarf að vera með sjálfstraust til að spila með A-landsliðinu á því leveli sem við viljum vera á. Þegar Viðar Örn er að skora mörk og boltinn dettur fyrir hann í boxinu og hann skorar, það er Viðar Örn. Hann er frábær þar.“

,,Á meðan hann er í meiðslum og þarf að fara í langt ferðalag og í nýjum klúbb þá þarf hann að komast af stað. Hann þarf að skora mörk í Rússlandi og þá er hann tilbúinn að hafa dyrnar opnar. Ef hann er nógu góður fyrir landsliðið þá veljum við hann.“

,,Ég skil hann að því leitinu til, þegar þú ert með endalaust af röddum að segja ‘Af hverju er hann ekki valinn? Hættu bara, þú átt betra skilið.’ Þetta síast inn, hann hafði spilað 120 mínútur fyrir Ísland í mótsleikjum á fjórum árum þegar hann tekur þessa ákvörðun.“

,,Hann hafði fengið einhverja 12 æfingaleiki og aldrei 90 mínútur nánast. Það er auðvelt að verða pirraður. Ég ber fulla virðingu fyrir hans ákvörðun og hans tilfinningum. Myndi ég gera þetta með mína hæfileika? Aldrei.“