Menningarráðuneyti Rússlands hefur afturkallað leyfi fyrir útgáfu nýjustu myndar Armando Iannucci, The Death of Stalin. Um er að ræða kolsvarta kómedíu um síðustu daga leiðtoga Sovétríkjanna sálugu og fer Steve Buscemi með eitt aðahlutverkanna.

Í frétt breska blaðsins Guardian kemur fram að háttsettir embættismenn í Rússlandi hafi kvartað vegna myndarinnar, sagt hana móðgandi og öfgakennda eftir sýningu á mánudagskvöld. Áður hafði nefnd innan ráðuneytisins mælt með því að frumsýningu myndarinnar yrði frestað vegna þess að um svipað leyti voru 75 ár liðin frá orrustunni um Stalíngrad.

Armando Iannucci, sem er einna besta þekkt fyrir að vera handritshöfundur Veep og The Thick of It, segir að Rússar hafi tekið myndinni vel, bæði blaðamenn og aðrir. „Ég hef heyrt tvennt um myndina; að hún sé fyndin en sönn. Ég er enn sannfærður um að við fáum að dreifa henni í Rússlandi,“ segir hann.

Myndin hefur hlotið góða dóma víðast hvar og var hún til dæmis tilnefnd til tveggja BAFTA-verðlauna. Á vefnum Metacritic er hún með einkunnina 88 af 100 mögulegum.