Gylfi Þór Sigurðsson, fyrirliði Íslands í kvöld, segir að liðið hafi ekki verið langt frá því að fá stig gegn Sviss á Laugardalsvelli.
Ísland þurfti að sætta sig við 2-1 tap að lokum en pressaði stíft að marki gestanna undir lok leiksins.
,,Við vorum ekki langt frá því að jafna. Við settum mikla pressu undir lokin en runnum út á tíma,“ sagði Gylfi.
,,Þessi leikur var mjög jafn, allavegana í fyrri hálfleik. Eftir fyrsta markið þeirra opnast leikurinn aðeins því við þurfum að taka sénsa.“
,,Bæði mörkin þeirra frá okkar sjónarhorni þá eru þau svekkjandi og eitthvað sem við getum komið í veg fyrir.“
,,Á móti svona liði sem vill halda boltanum þá þegar þeir skora fyrsta markið þá spilast þetta upp í þeirra hendur. Við þurfum að teygja á liðinu og taka sénsa.“
Gylfi var nálægt því að skora í fyrri hálfleik en veit ekki hvort hann hafi gert rétt með að taka skot í fyrsta.
,,Ég hefði getað tekið touch, ég ákvað að skjóta og koma markmanninum á óvart en þetta var ágætlega varið hjá honum.“
Alfreð Finnbogason skoraði frábært mark fyrir Ísland í leiknum en Gylfi hefur verið að kenna honum á æfingasvæðinu.
,,Við höfum farið yfir þetta í vikunni, frábært mark hjá honum og ég er ánægður meðað hann sé að skora fyrir utan teig núna.“
