Fimm eru látnir eftir skyndiflóð á spænsku eyjunni Mallorca í gærkvöldi. Flóðið kom í kjölfar tveggja klukkustunda úrhellis. Rigningin gerði það að verkum að á flæddi yfir bakka sína með fyrrgreindum afleiðingum.
Eins og við greindum frá í morgun kom þessi mikla úrkoma yfirvöldum á óvart. Spáð hafði verið rigningu en í mun minni mæli en raunin varð. Áfram er spáð rigningu á Mallorca.
Bresk hjón eru meðal hinna látnu en þau fundust látin í leigubíl sem varð fyrir vatnsflaumnum í bænum Sant Llorenc des Cardassar. Leigubílstjórans er enn saknað.
Bæjarstjóri Sant Llorenc, Rosario Sanchez, staðfesti að fimm væru látnir, þrír karlar og tvær konur. Einn þeirra er Rafel Gili, fyrrverandi bæjarstjóri Arta.
