Gestum Ensku óperunnar var gert að afhenda vatnsflöskurnar sínar sem fólkið ætlaði að taka með sér á sýningu Salome eftir Strauss um helgina. Fram að þessu hefur verið í lagi að taka með sér vatnsflösku og finnst mörgum það vera jafn sjálfsagt og að taka með sér kíki.
Bannið er ekki vegna græðgi að sögn Stuart Murphy, framkvæmdastjóra Ensku óperunnar. Segir hann í svari á Twitter, þar sem gestir kvörtuðu undan þessu, að ástæðan sé að sumir stundi það að taka með sér vodka í vatnsflöskum á sýningar.
„Það er fáránlegt að fylgast með dyravörðum láta fólk hella úr vatnsflöskum á stéttina fyrir utan óperuna, eins og það megi ekki taka með sér hættulegt vatn inn á sýninguna. Þetta er óþarfa vitleysa,“ segir einn notandi á Twitter.
Stuart svarar: „Það sem er óþarfi er að hella vodka í vatnsflöskur og eyðileggja þannig upplifun annarra. Við þurftum að gera þetta til að passa að þú og aðrir getið notið ykkar. Ég veit að þetta er pirrandi en hitt er meira pirrandi.“