„Ég var ekki alveg að átta mig á þessu, allt í einu fóru að hrúgast inn vinabeiðnir,“ segir Arna Ír Gunnarsdóttir, félagsráðgjafi, bæjarfulltrúi og frambjóðandi fyrir Samfylkinguna en það kom henni nokkuð á óvart þegar fjöldi fylgjenda hennar á samfélagsmiðlinum Snapchat tók skyndilegan kipp síðastliðið laugardagskvöld. Fljótlega kom þó ástæðan í ljós.

Arna skipar þriðja sætið fyrir Samfylkinguna í Suðurkjördæmi, en í samtali við blaðamann kveðst hún ekki beint vera sú virkasta á samfélagsmiðlinum.

„Ég hef hingað til aðeins verið með nánustu fjölskyldu og vini sem fylgjendur, en maður hefur náttúrulega tekið eftir að þetta er mjög vinsæll miðill hjá ungu kynslóðinni,“ segir hún en rás hennar á Snapchat ber heitið arnair.

Það var síðan á laugardagskvöldið sem að fylgjendahópur Örnu fór skyndilega sístækkandi. Skömmu áður hafði fegurðardrottningin Arna Ýr Jónsdóttir birt tilfinningaþrungin myndskeið á Snapchat rás sinni arnayr, þar sem hún greindi frá samskiptum sínum við eiganda fegurðarsamkeppninnar Miss Grand International í Las Vegas.

Það er ekki að spyrja að því að fregnir eru fljótar að berast á tímum samfélagsmiðla.

„Allt í einu fór fullt af unglingsstúlkum sem ég þekkti ekkert að vilja fylgjast með mér og ég skildi ekki neitt í neinu,“ segir Arna hlæjandi en bætir við að þegar hún hafi farið inn á fréttamiðla síðar um kvöldið og lesið um raunir Örnu Ýrar hafi hún lagt saman tvo og tvo.

Hún viðurkennir glettilega að það hafi verið örlítið svekkjandi að komast að ástæðunni fyrir þessari skyndilegu frægð, en tekur undir að ef til vill megi nýta það nú í aðdraganda kosninga. Þá segir Arna Ír glettin að henni hafi hvorki borist gjafir eða tilboð vegna þessa óvæntu frægðar.

Blaðamaður nýtir tækifærið og spyr frambjóðandann hverju hún vilji koma á framfæri fyrir næsta laugardag. Svarið er einfalt.

„Ég vil bara endilega hvetja alla til að nýta sér kosningaréttinn. Vera vel upplýstir og kynna sér málefni flokkanna.“