Í kjölfar frétta, um hækkun fæðingarorlofsstyrks fyrir foreldra sem fæða börn sín 15. október eða síðar, var hafin undirskriftasöfnun til handa þeim foreldrum sem fæddu börn sín fyrir miðnætti 14. október. Þetta var tilkynnt á hinum geysivinsæla samræðuvettvangi Beauty Tips á Facebook.

„Við undirrituð skorum á ríkisstjórnina að gæta jafnræðis meðal foreldra sem fá greitt úr fæðingarorlofssjóði. Við teljum rétt að um greiðslur til foreldra, sem fá greitt úr sjóðnum á sama tíma, gildi sömu reglur óháð fæðingardegi barns. Engin rök standa til þeirrar mismununar sem boðuð hefur verið. Því krefjumst við þess að þær breytingar sem boðaðar hafa verið á fæðingarorlofsgreiðslum og taka munu gildi 15. október næstkomandi verði almennar en ekki bundnar því skilyrði að barn foreldris sé fætt 15. október 2016 eða síðar,“ stendur á vef undirskrifasöfnunarinnar. Yfir tvöþúsund manns hafa nú þegar skrifað undir.