Gylfi Þór Sigurðsson mun vinna með nýjum stjóra hjá Everton á þessu tímabili en Marco Silva er nú tekinn við.

Gylfi segir að Silva hafi breytt miklu á stuttum tíma hjá Everton en hann vill koma inn með sínar eigin hugmyndir.

,,Það er mikið sem hann hefur reynt að koma inn með á mjög stuttum tíma,“ sagði Gylfi.

,,Ég hef aðeins verið hérna í nokkrar vikur en það er mikið sem hefur átt sér stað á æfingasvæðinu.“

,,Hann er að reyna að fá okkur til þess að njóta þess að spila fótbolta, pressa á önnur lið, leggja hart að okkur og vera skipulagðir varnarlega.“

,,Ég held að við séum að komast þangað en við erum enn að gefa klaufaleg mörk. Við vitum það og ræðum það í búningsklefanum.“

,,Við höfum ekki fengið mörg mörk á okkur þar sem lið eru að yfirspila okkur, þetta eru frekar klaufaleg mistök sem kosta okkur.“

,,Hann ræddi ekki mikið um mistökin gegn Valencia eða síðsta leik því það eru eiginlega einu mörkin sem við höfum fengið á okkur, eftir okkar mistök.“