Hljómsveitin Sálin hans Jóns míns fagnar í ár 30 ára afmæli, en hljómsveitin var stofnuð þann 10. mars 1988 þegar Sálin hans Jóns míns kom fram í fyrsta skipti.

Hljómsveitin hefur nú ákveðið að kveðja og af því tilefni verður blásið til kveðju- og viðhafnartónleika í Eldborgarsal Hörpu þann 20. október.

Miðar fóru í sölu þann 20. Júní kl. 12 og seldist upp á þá á innan við sjö mínútum. Urðu því margir aðdáendur frá að hverfa. Fljótlega var ákveðið að halda aðra tónleika síðar um kvöldið og var sama upp á teningnum þar, uppselt á örskotsstundu.

Það er því ljóst að kátt verður í Eldborg laugardagskvöldið 20. október næstkomandi þegar Sálin treður upp á tvennum tónleikum í röð fyrir fullum sal.