Ísland er fámennt land og það virðist aldrei hætta að koma heimspressunni á óvart. Flest okkar könnumst við einhvern í liðinu eða teyminu í kringum það, eða í það minnsta könnumst við einhvern sem gerir það.
Fyrir leik Íslands og Argentínu í gær tók erlendur fréttamaður viðtal við íslenskan stuðningsmann sem reyndist síðan vera faðir eins leikmanns í íslenska liðinu.
Umræddur fréttamaður heitir Michael Place og vinnur hann fyrir Xinhua-fréttaveituna í Kína. Hann var mættur fyrir utan Spartak-völlinn til að taka púlsinn á stuðningsmönnum fyrir leik og einn þeirra sem hann ræddi við var Guðmundur Örn Jóhannsson. Guðmundur er pabbi landsliðsmannsins Jóhanns Berg en það vissi Place ekki áður en viðtalið var tekið.
Í viðtalinu er Guðmundur spurður í leikinn og möguleika Íslands. Hann segir að Ísland eigi möguleika en hann sé persónulega sérstaklega spenntur því sonur hans er að fara spila. Þá kemur upp skemmtilegur svipur á fréttamanninn sem spyr hann út í hver sonur hans er. Þá kemur það upp úr krafsinu að sonurinn er Jóhann Berg Guðmundsson, leikmaður Burnley í ensku úrvalsdeildinni.
Þetta skemmtilega innslag má sjá hér að neðan.
Xinhua journalist Michael Place talks to an Iceland fan who happens to be mainstay player Gudmundsson's father. Later, Iceland secures a historic draw with World Cup favorite Argentina. Imagine how proud the father would be! pic.twitter.com/Kdra1djbjC
— Xinhua Sports (@XHSports) June 16, 2018
