Páll Magnússon, fyrrverandi útvarpsstjóri og þingmaður Sjálfstæðisflokksins, lýsir innri manni Heimis Hallgrímssonar landsliðsþjálfara á magnaðan hátt. Páll og Heimir þekkjast vel, fjölskyldur þeirra hafa tengst vinaböndum lengi og segist Páll hafa verið að springa úr stolti yfir frammistöðu vinar síns.

„Ég er oft spurður hvernig maður Heimir sé inn við beinið og lendi stundum í að útskýra það í löngu máli. En ekki lengur. Saga dagsins segir allt: Hálftíma eftir sögulegt jafntefli við Argentínu í dag hringdi Heimir í vin sinn í Eyjum og var þá enn staddur á vellinum í Rússlandi,“ segir Páll í færslunni á Facebook í gær og lýsir svo samtali Heimis við vin sinn:

„Eftir stutt spjall um Messi og strákana spurði Heimir, standandi yfir hausamótunum á Argentínu á HM: “En hvernig gekk ÍBV-stelpunum á TM-mótinu?“ (Til upplýsinga: Í gær lauk í Vestmannaeyjum fótboltamóti stelpna í 5.flokki). Segir þetta ekki allt sem segja þarf?“