„Ein af ástæðum þess að landsliðið í fótbolta naut gífurlegra vinsælda í Frakklandi og um allan heim er sú að leikmenn Íslands eru auðmjúkir og koma fallega fram við aðra,“ segir Þorgrímur Þráinsson sem verið hefur í þjálfunarteymi íslenska landsliðsins.

Þorgrímur, sem fylgdi íslenska liðinu í Frakklandi, deilir fallegri sögu á Facebook-síðu sinni þar sem hann fer fögrum orðum um leikmenn landsliðsins. Þá greinir hann frá góðverki landsliðsfyrirliðans, Arons Einars Gunnarssonar, sem kom eldri konu á óvart undir lok ferðar íslenska liðsins.

„Til að komast í heimsfréttirnar skiptir árangurinn innan vallar auðvitað mestu máli en auðmýkt leikmanna og virðing fyrir fólki og umhverfinu hefur líka sitt að segja. Tenging leikmanna við áhorfendur var einstök, víkingaklappið vakti athygli en síðast en ekki síst sú staðreynd að íslensku leikmennirnir eru þakklátir og vandaðir einstaklingar – eins og kom í ljós alla daga,“ segir Þorgrímur. Hann heldur áfram:

„Konan á myndinni stóð úti á götu, skammt frá æfingasvæðinu, á hverjum einasta degi og klappaði fyrir leikmönnum þegar rútan renndi framhjá. Þetta gerði hún í tæpan mánuð. Til að sýna þakklæti sitt áritaði Aron fyrirliði eina hóteltreyju og færði konunni að gjöf undir lok dvalarinnar í Annecy. Hún og eiginmaðurinn voru kampakát og sérlega þakklát. Hún felldi tár og kyssti þann sem færði henni treyjuna. Konan mun aldrei gleyma Íslandi og leikmenn aldrei gleyma konunni. Góðverk á dag er gulls ígildi.“