„Við höfum farið mjög lauslega í að útskýra fyrir honum af hverju mamma hans er þarna. Við höfum sagt honum að hún hafi gert hluti sem hún mátti ekki gera,“ segir Margrét Fenton, móðir Söndru Sigrúnar sem situr af sér 37 ára fangelsisdóm í Bandaríkjunum. Sandra er móðir fimm ára drengs sem kemur reglulega í heimsóknir til hennar ásamt ömmu sinni og afa. Vegna gildandi laga um reynslulausn í Virginíuríki mun hún ekki losna úr fangelsi fyrr en um sextugt.

Hér má finna brot úr viðtalinu við móður Söndru en viðtalið birtist í heild sinni í helgarblaði DV

Kemur með að heimsækja mömmu

Rylan, fimm ára sonur Söndru, hefur búið hjá ömmu sinni og afa frá fæðingu. Hann kemur með að heimsækja mömmu sína í fangelsið og leikur sér þá á meðan. Fyrir honum eru heimsóknirnar skemmtilegar. Sandra hefur úr litlu að moða og í eitt skipti gaf Sandra syni sínum mynd sem hún teiknaði á servíettu.

Afmælisgjöf Söndru til sonarins, mynd teiknuð á servettu

„Hann þekkir auðvitað ekkert annað en að búa hjá ömmu og afa. Við höfum farið mjög lauslega í að útskýra fyrir honum af hverju mamma hans er þarna. Við höfum sagt honum að hún hafi gert hluti sem hún mátti ekki gera. Annars hefur hann í rauninni lítið spurt. Hann sér þetta bara þannig að mamma er þarna og hann býr hjá ömmu og afa. Í leikskólanum hans kalla krakkarnir mig mömmu hans og hann er ekkert að leiðrétta þau. Þau hafa aldrei spurt hann út í mömmu hans,“ segir Magga jafnframt en viðurkennir að vissulega kvíði hún því þegar Rylan verður eldri og fer að heyra sögur af mömmu sinni frá fólki úti í bæ, enda geti dómharka og fordómar fólks verið hreint viðurstyggileg.

„Við erum með svör ef hann spyr. En við ætlum ekki að setjast niður með honum að fyrra bragði og útskýra þetta fyrir honum.“