Sænski sveitastjórnarmaðurinn Pontus Båth liggur undir gagnrýni í Svíþjóð eftir að það spurðist út að hann hefði mætt í hrekkjavökugleðskap sem Peter Madsen.

Madsen þessi komst í fréttirnar í haust en hann er grunaður um að hafa myrt sænska blaðakonu, Kim Wall, um borð í kafbáti sínum.

Pontus, sem er fulltrúi Hægri flokksins (s. Moderaterna) í Torslanda, birti mynd af sér á Instagram-síðu sinni í búningnum. Aftonbladet hefur eftir honum að um hafi verið að ræða einkagleðskap og þemað hafi verið ógnvekjandi eða illir einstaklingar.

Pontus hefur sett stefnuna á að ná kjöri á þing á næsta ári.

Samflokksmenn Pontusar hafa gagnrýnt hann, á meðal þeirra er Maria Ryden sem segir hann hafa sýnt dómgreindarskort. Hún hafi rætt við hann og látið þá skoðun sína í ljós. Myndin hefur nú verið fjarlægð af Instagram-síðu hans.

Pontus segir við Aftonbladet að ætlun hans hafi ekki verið að særa neinn og viðurkennir hann að hafa gengið of langt.