Að minnsta kosti þrír hafa látist að undanförnu af völdum banvænnar veiru á Indlandi. Veiran veldur því að heilinn bólgnar, fólk fær hita, uppköst og krampa. Veiran berst yfirleitt með leðurblökum. Ekkert bóluefni er til gegn henni.

Veiran nefnist Nipah og berst aðallega með ávaxtaleðurblökum. Dánartíðnin er um 75 prósent. Veiran getur einnig borist úr svínum og á milli manna.

Sky segir að þrír hið minnsta hafi látist af völdum veirunnar í Kerala. Fólkið var allt úr sömu fjölskyldunni.

Talið er að átta til viðbótar hafi látist af völdum veirunnar, þar á meðal nunna sem annaðist sjúklinga. Þetta hefur þó ekki enn verið staðfest.

Indverskir fjölmiðlar hafa eftir nágrönnum hinna látnu að fólkið hafi borðað ávexti af plantekru þar sem þau voru að byggja sér hús.

Eina meðferðin við Nipah veirunni er að fylgjast vel með sjúklingunum og reyna að láta þeim líða eins vel og hægt er.

Nipah veiran greindist fyrst í Malasíu 1998 og barst þaðan til Singapore þar sem rúmlega 100 manns létust af völdum hennar. 50 manns létust af völdum veirunnar á Indlandi 2001 og 2007.

Í Bangladesh létust rúmlega 100 mann af völdum veirunnar 2004.