Michael Cohen, lögmaður Donald Trump Bandaríkjaforseta, fékk að sögn hálfa milljón dollara frá fyrirtæki, sem rússneskur auðmaður sem tengist Vladímír Pútín Rússlandsforseta náið, á í kjölfar forsetakosninganna 2016. Þessu heldur Michael Avenatti, lögmaður klámstjörnunnar Stormy Daniels, fram. Daniels segist hafa átt í kynferðislegu sambandi við Trump á árunum 2006 og 2007.

Cohen hefur enn sem komið er ekki tjáð sig um staðhæfingar Avenatti um greiðslurnar. Avenatti segir að peningarnir hafi komið frá rússnesk-úkraínska auðmanninum Viktor Vekselberg en hann er einn af auðugustu mönnum Rússlands.

Ekki hefur komið fram fyrir hvað þessi greiðsla var.

Avenatti hefur ekki lagt nein gögn fram sem styðja þessa staðhæfingu hans og ekki er vitað á hverju hann byggir þetta.

CNN segir að Robert Mueller, sérstakur saksóknari sem rannsakar tengsl Trump við Rússa, hafi yfirheyrt Vekselberg um þessar greiðslur sem eiga að hafa borist frá fyrirtæki Vekselberg, Columbus Nova, til Cohen. Vekselberg var einnig spurður út í fjárframlög forstjóra Columbus Nova til kosningabaráttu Trump en forstjórinn, Andrew Intrater, er frændi Vekselberg.