Logi Einarsson, formaður Samfylkingarinnar, segist á Facebooksíðu sinni vera ósammála tillögum danskra jafnaðarmanna í útlendingamálum, sem kynntar voru í gær á formannafundi norrænu jafnaðarflokkanna í Danmörku.

Logi segir tillöguna ómannúðlegar:

„Hún virðist því miður um margt eiga að snúast um ómannúðlega nálgun á forsendum þeirra flokka sem við jafnaðarmenn höfum gagnrýnt harðlega, s.s. Dansk folkeparti. Á formannafundi norrænu jafnaðarflokkana í gær kynnti Mette Fredriksen þessa nýju stefnu fyrir okkur formönnum. Hún sló mig um margt afar illa og lét hana vita mjög skýrt um mína afstöðu. Ég vona innilega að aðrir jafnaðarflokkar á Norðurlöndunum feti ekki í spor danska systurflokksins og mun beita mér hart fyrir því að Samfylkingin standi fast í lappirnar og gefi aldrei afslátt af mannúð. Að flokkurinn beiti sér fyrir því að við öxlum okkar ábyrgð, með hana að leiðarljósi, í víðtæku samstarfi við aðrar þjóðir.“

Þá segist Logi vilja taka öðruvísi á vandanum:

„Ég trúi að það er rétta leiðin til að takast á við þær hræðilegu aðstæður sem fólk á flótta frá stríði og ömurlegum aðstæðum býr við. Það er mikilvægt að til séu skýrar reglur um þessi mál, sem gerir okkur kleyft að búa nýjum landsmönnum góðar aðstæður. Gefa þeim möguleika á að aðlagast okkar samfélagi og gildum; þannig munum við njóta ríkulega ávaxta þeirra þeirra. Leiðin er klárlega ekki að reisa múra um Vesturlönd eða alla á ótta og tortryggni. Danskir jafnaðarmenn tala um að þetta sé uppgjör við það hvað það er að vera húmanisti en nýja stefnan talar því miður öðru máli.“