Guðrún Ýr er ung og upprennandi söngkona úr Mosfellsbæ. Hún gaf í dag út sitt fyrsta lag sem ber titilinn Ein og er greinilegt að þarna er á ferðinni listamaður sem gaman verður að fylgjast með í framtíðinni. Guðrún er 21 árs gömul og stundar nám í söng og píanóleik. Bleikt hafði samband við Guðrúnu Ýr til að fræðast aðeins um hana, hvers vegna hún ákvað að byrja að syngja og hvað væri fram undan hjá þessari hæfileikaríku söngkonu.

Hversu lengi hefurðu verið að syngja?

Ég hef verið að læra jazzsöng í rúm 4 ár, en söng lítið áður en ég byrjaði í þessu námi. Ég hef samt verið í tónlist síðan ég man eftir mér og lærði á fiðlu í mörg ár.

Hvað kom til að þú ákvaðst að færa þig yfir í sönginn?

Mig langaði að stíga svolítið út fyrir þægindarammann og prófa eitthvað nýtt í tónlistinni, sem að ég vissi að yrði bæði krefjandi en skemmtilegt, og hafði alltaf langað til að læra að syngja, en aldrei þorað að gera neitt í því. Svo ég ákvað að slá til, og hef ekki séð eftir því síðan.

Samdir þú lagið og textann?

Bjarki Sigurðsson og Teitur Helgi Skúlason vinir mínir sömdu lagið, og textann samdi ég sjálf.

Nú er texti lagsins afar persónulegur. Hvað veitti þér innblástur?

Já, textinn er mjög persónulegur. Ég samdi hann út frá því hvernig mér leið á tímabili, og langaði að koma þessu frá mér eins ,,straight forward“ og ég gæti, þannig að tilfinningarnar kæmust algjörlega til skila.

Hverjir eru þínir áhrifavaldar í tónlist?

Erfið spurning, ég veit það ekki alveg. Mínir helstu áhrifavaldar í tónlist eru mjög margir ef ég á að segja eins og er. Ég hef mikið dálæti á jazzsöngkonum eins og Ellu Fitzgerald og Amy Winehouse, en ég hlusta líka mikið á rapp og finnst virkilega gaman að lögum sem innihalda góða texta, og skilja eftir einhvern boðskap eða pælingar sem maður getur rýnt í.

Hvað er svo í pípunum hjá þér? Ætlarðu að gefa út fleiri stök lög eða er diskur væntanlegur?

Við erum að vinna að stærra verkefni í augnablikinu sem kemur vonandi út bráðlega.

Það er óhætt að fullyrða það að við bíðum spennt eftir næstu skrefum Guðrúnar Ýrar og óskum henni velfarnaðar í tónlistarheiminum.

Hér má hlusta á lagið Ein á Spotify.