Guðbjörg Gunnarsdóttir, markvörður íslenska kvennalandsliðsins, var mjög svekkt með tap gegn Frökkum í kvöld.

Ísland þurfti að sætta sig við 1-0 tap á EM í Hollandi en eina mark leiksins skoruðu Frakkar úr vítaspyrnu.

,,Ég er fyrst og fremst mjög svekkt. Ég var að segja í öðru viðtali að mér líður pínu eins og ég hafi verið rænd,“ sagði Guðbjörg.

,,Þetta var grátlega ódýrt víti undir lok leiks. Þetta var ömurlegt. Ég man varla eftir opnu færi sem þær fengu.“

,,Við vissum allt sem var að fara gerast í þessum leik. Við hefðum getað fengið fleiri bolta á milli manna en við spiluðum skynsamlega og spiluðum vel. Þetta er bara svo svekkjandi.“

,,Við getum farið með hausinn hátt úr þessu og eigum að vera með sjálfstraust í næsta leik þrátt fyrir tap núna.“

,,Ég veit ekki við hverju þær bjuggust. Þær þekktu engan af okkar leikmönnum en ef þær vita eitthvað um Íslendinga þá ættu þær að vita að við erum fastar fyrir. Þær voru hálf grenjandi.“