Albert Guðmundsson var gjörsamlega allt í öllu þegar Ísland vann 4-1 sigur á Indónesíu í dag.

Albert kom inn sem varamaður á 27 mínútu leiksins og jafnaði leikinn fyrir Ísland undir lok fyrri hálfleiks.

Hann tók svo hornspyrnuna sem annað mark Íslands kom upp úr en það skoraði Arnór Smárason.

Albert skoraði þriðja mark Íslands úr vítaspyrnu sem hann fiskaði sjálfur. Hann fullkomnaði svo þrennu sína á 71 mínútu með einstaklings framtaki af bestu gerð.

Plús og mínus er hér að neðan.

Plús:

Frammistaða ALberts Guðmundssonar var mögnuð, frábærar hreyfingar, geggjaður leiksskilningur. Hann á heima í HM hópi Íslands. Þrenna og frábærir taktar, fullkomin dagur.

Jón Guðni FJóluson heldur áfram að standa sig vel þegar hann fær tækifæri, ætti að vera nokkuð öruggur með sæti sitt til Rússlands.

Íslenska liðið spilaði vel í leiknum í dag, margt jákvætt sem hægt er að taka úr leiknum og mikilvægar mínútur fyrir marga leikmenn.

Mínus:

Vonarstjarna Íslands þegar kemur að markvörðum, Rúnar Alex Rúnarsson gerði sig sekan um barnaleg mistök í marki Indónesíu.

Það er mínus fyrir íslenska liðið að hafa ekki fengið meiri mótspyrnu í þessum tveimur leikjum.