„Manneskjur með svona ógeðslega húð ættu ekki að fara í sund“ sagði ókunnug kona við hina 17 ára gömlu Jónínu Guðný Jóhannsdóttur þar sem hún var stödd í sundlaug. Jónína segir að þetta sé ekki eina ónærgætna athugasemdin sem hún hefur fengið að heyra varðandi húðslit sem hún ber en slitin eru tilkomin vegna þyngdaraukningar.

Jónína, sem hefur létt sig um 43 kíló á seinustu þremur árum en í samtali við Bleikt nefnir hún dæmi um andstyggilegar og ónærgætnar athugasemdir sem hún hefur fengið að heyra um útlit sitt, jafnvel frá ókunnugu fólki. Þetta er athugasemdir eins og: „Hver dó og gaf þér húðina sína?“ ,„Réðst köttur á þig ?“ og „Hver dó og gaf þér húðina sína?“

Segir hún jafnframt að vegna aðkastsins forðist hún að fara í sund og klæðast stutterma og magabolum. Athugasemd konunnar, sem tjáði henni að manneskjur með „svona ógeðslega húð„ ættu ekki að fara í sund, var þó sú vandræðalegasta og leiðinlegasta af öllum. „Ég skammaðist mín svo mikið að ég fór strax upp úr lauginni grátandi. Ég vildi ekki að fólk myndi horfa á mig,“ segir Jónína jafnframt en hún gerir ekki ráð fyrir að fara í sund á næstunni.

„Ekki dæma fólk á þennan hátt. Þetta fólk hefur ekki hugmynd um það hvað maður er búin að ganga í gegnum andlega og líkamlega. Ég sé bara ekki hvernig fólk getur sagt svona lagað við aðra,“ segir hún síðan um leið og hún kemur sínum skilaboðum áleiðis til kvenna og stúlkna sem eru þjakaðar af óöryggi vegna líkama síns.

„Vertu stolt a þínum líkama og ekki hlusta á það hvað aðrir segja. Vertu þú sjálf á eins frábæran veg og þú sjálf getur. Ég er stolt af mínum líkama. Ég þarf að byggja upp mitt eigið sjálfstraust aftur eftir þetta en það mun koma sá dagur fljótlega sem ég mun fara aftur í sund, í bikini með bros á vör.“