Gítarleikarinn Guðlaugur Auðunn Falk, eða Gulli Falk, gítarleikari hljómsveitanna Dark Harvest og Audio Nation greindist nýlega með krabbamein og biður fjölskylda hans um hjálparhönd.

Sonur Gulla, Árni Hrafn Falk, hefur stofnað Facebook síðuna „Styrktarsíða fyrir Gulla Falk vegna veikinda hans.“ Á Facebook síðunni biðja börn Gulla ásamt sambýliskonu hans fólk um að rétta þeim hjálparhönd.

Gulli greindist fyrir stuttu síðan með illkynja krabbamein í kviði og fæti. Framundan er lyfjameðferð, stórar, flóknar og erfiðar skurðaðgerðir. Gulli er bæði þekktur gítarleikari og lagahöfundur, og hefur spilað og skrifað fyrir marga þekkta tónlistarmenn.

Árni, hefur stofnað bankareikning í sínu nafni, þar sem hann biður þá sem sjá sér fært um að leggja söfnuninni lið, en þeir sem sjái sér það ekki fært væri vel þegið ef beðið væri fyrir honum – og sendir jákvæðir straumar.

Í samtali við DV segir Árni að pabbi hans hafi undanfarið fundið fyrir einhverjum verkjum en það hafi ekki verið neitt til að kippa sér upp við, svo hafi annað komið á daginn. Árni segir pabba sinn ætla að sigrast á þessu. „Það þýðir ekkert annað en að vera jákvæður,“ segir hann að lokum af miklum baráttuhug.

Þeir sem vilja leggja söfnuninni lið geta millifært frjáls framlög á eftirfarandi reikning en frekari upplýsingar má finna á styrktarsíðunni.