Liverpool hefur áhuga á að fá Maghnes Akliouche til félagsins í sumar samkvæmt franska miðlinum L’Equipe.

Akliouche, sem er 24 ára gamall kantmaður Monaco, er sagður líklegur til að yfirgefa félagið eftir tímabilið og Liverpool er sagt mjög áhugasamt um að klófesta Frakkann.

Talið er að Akliouche kosti um 44 milljónir punda en Liverpool gæti fengið samkeppni um hann frá Paris Saint-Germain.

Akliouche hefur verið einn af lykilmönnum Monaco undanfarin tímabil og spilað 137 leiki fyrir félagið. Þá hefur hann skorað 23 mörk og lagt upp önnur 28 frá því hann braust inn í aðalliðið.

Á yfirstandandi tímabili hefur hann skorað fjögur mörk og átt átta stoðsendingar í 41 leik, bæði sem hægri kantmaður og í hlutverki sínu framarlega á miðjunni.

Mohamed Salah er á förum frá Liverpool í sumar og því hafa margir kantmenn verið orðaðir við félagið undanfarið.