Sigurvegarinn kynntur klukkan 11 á íslenskum tíma
Klukkan 11 verður tilkynnt hver hlýtur Nóbelsverðlaunin í bókmenntum árið 2017. Hægt er að fylgjast með beinni útsendingu frá tilkynningu sænsku nóbelsakademíunnar hér fyrir neðan.
Verðlaunin eru líklega æðsti heiður sem lifandi rithöfundi getur hlotnast. Fagaðilar hvaðanæva úr heiminum senda sænsku akademíunni tilnefningar, en fimm manna nefnd á vegum hennar velur sigurvegarann ár hvert. Verðlaunaathöfnin sjálf fer fram í desember næstkomandi, en verðlaunaféð sem kemur úr arfi Alfred Nobels er 8 milljónir sænskra króna, eða um 100 milljónir íslenskra króna.
Sá sem hlýtur verðlaunin verður er hundraðasti og fjórtándi Nóbelsverðlaunahafinn í bókmenntum, en verðlaunin voru veitt í fyrsta skipti árið 1901. Í fyrra hlaut bandaríska söngvaskáldið Bob Dylan verðlaunin við misjafnar undirtektir bókmenntaspekúlanta. Síðasta áratug hafa eftirfarandi höfundar hlotið bókmenntaverðlaun Nóbels: hvítrússneska blaðakonan Svetlana Alexievich árið 2015, Patrick Modiano frá Frakklandi árið 2014, Alice Munro frá Kanada árið 2013, Mo Yan frá Kína árið 2012, Tomas Tranströmer frá Svíþjóð árið 2011, Mario Vargas Llosa frá Perú árið 2010, Herta Müller frá Þýskalandi árið 2009, Fransk-Máritíski rithöfundurinn J. M. G. Le Clézio árið 2008 og Doris Lessing frá Bretlandi árið 2007.
[youtube https://www.youtube.com/watch?v=QZwziZh-dPk&w=560&h=315]
