Í samtali við Sky News sagðist hann telja að Kínverjar taki nú hröð skref í undirbúningi innrásar í Taívan.
Á sama tíma geti Rússar vel verið að undirbúa sig undir hernað gegn NATÓ-ríki.
Hann hefur tekið saman lista með „80 vísbendingum um undirbúning fyrir deilur og vopnuð átök“. „Með öðrum orðum, við erum mjög nærri stríði,“ sagði hann.
Lönd, sem undirbúa hernað, þurfa venjulega ekki aðeins að undirbúa herinn, heldur einnig iðnaðinn, efnahagslífið og íbúana.
Johnson sagði að eitt af skýrustu merkjunum um stríð í framtíðinni sé þegar land byrjar að stækka flotann sinn mikið en það getur tekið allt að 20 ár. Samtímis er byrjað byggja upp innviði sem gagnast hermönnum.
Þegar nær dregur árás, fjölgar heræfingum, flugskeytaprófum og fjölgun hermanna. Um leið verður orðræðan í samskiptum við önnur ríki harðari og landið dregur sig út úr ýmsum alþjóðasamningum.
Hann sagði að allt þetta hafi sést í aðdraganda innrásar Rússa í Úkraínu 2022 sem og í aðdraganda síðari heimsstyrjaldarinnar.
Hann segir að margt af þessu sama eigi sér stað núna og tók sérstaklega sem dæmi margar flotaæfingar Kínverja og hraða uppbyggingu hersins.
„Það sem vekur mestar áhyggjur er að þeir hafa lýst því yfir að þeir vilji eiga 1.000 kjarnaodda fyrir 2030,“ sagði hann.
Hvað varðar Rússland, sagðist hann óttast að Rússar séu að undirbúa sig undir að gera árás á NATÓ-ríki og það jafnvel þótt þeir standi í stríði í Úkraínu.
„Þeir eru að undirbúa sig. Þeir eru á fullu að framleiða skotfæri. Og við hikum enn og vonum að þetta gerist kannski ekki,“ sagði hann og hnýtti í Bretland og önnur Evrópuríki sem eru að hans sögn ekki reiðubúin til að takast á við þetta.
„Ég skil ekki þennan skort á undirbúningi. Ég vildi gjarnan sjá breska flotann stækka, hraða uppbyggingu skotfæraframleiðslu í Bretlandi og sameiginlega framleiðslu með Evrópu,“ sagði hann.
