Þetta sagði Karen Philippa Larsen, nýdoktor hjá Dansk Institut for Internationale Studier, í samtali við Jótlandspóstinn. Hún hefur rannsakað starfsemi hópsins og fjallaði doktorsritgerð hennar meðal annars um hópinn.
Hún sagði að rússneska leyniþjónustan GRU hafi tekið stjórn hópsins yfir. Hópurinn hefur verið við störf í Afríku síðustu árin en það nýjasta sé að nú sé hann notaður til að finna fólk sem er reiðubúið til að fremja skemmdarverk í Evrópu og vinna við að hafa áhrif á skoðanir almennings. „Þetta er hluti af stóru rússnesku fjölþáttastríði,“ sagði hún.
Hún kom síðan með tvö raunveruleg tilfelli þar sem sýnt hefur verið fram á það í réttarhöldum að Wagnerhópurinn hafi komið við sögu.
Fyrra málið er frá Póllandi þar sem tveir menn voru handteknir 2023 og síðan dæmdir fyrir útbreiðslu rússnesks áróðurs með því að líma Wagner-límmiða upp og stunda njósnir. Markmiðið var að skapa félagslegan ótta og fá Pólverja til að trúa að Wagnerhópurinn væri nú þegar starfandi í landinu. Með því átti að sá efasemdarfræjum um getu pólsku leyniþjónustunnar sagði Larsen.
Hitt málið er frá mars 2024 þegar sex menn kveiktu í vörugeymslu í Lundúnum. Þar voru vörur sem áttu að fara til Úkraínu. Meðal annars rafalar og búnaður fyrir Internettengingar. Mennirnir voru ráðnir til starfa í gegnum samfélagsmiðlasíður Wagnerhópsins og fengu sem svarar til um fjögurra milljóna íslenskra króna fyrir vikið. Höfuðpaurinn í Englandi var síðar dæmdur í 17 ára fangelsi.
Mennirnir í Lundúnum áttu allir afbrotaferil að baki og létu freistast af peningunum.
Financial Times segir að nú hafi áherslur Wagnerhópsins færst frá því að reyna að ráða unga Rússa til að fara á vígvöllinn í Úkraínu, til að reyna að fá unga Evrópubúa til að taka að sér ákveðin verkefni gegn greiðslu.
Evrópskar leyniþjónustur eru mjög meðvitaðar um þetta og hefur að sögn Financial Times tekist að koma í veg fyrir margar fjölþáttaárásir sem Wagnerhópurinn hafði skipulagt.
