Þeir sem afneita loftslagsvánni eru mikið þeir sömu of hafna vísindunum þegar kemur að bólusetningum. Covid, og harðar aðgerðir stjórnvalda víða um heim ýtti undir samsæriskenningar en engum blöðum er um það að fletta að loftslagsváin er raunveruleg og hún er af mannavöldum. Við getum og eigum að sporna gegn þeirri óheillaþróun sem er í gangi. Þar leikur Evrópusambandið mikilvægt hlutverk. Magnús Árni Skjöld Magnússon, prófessor í stjórnmálafræði við Háskólann að Bifröst og formaður Evrópuhreyfingarinnar, er gestur Ólafs Arnarsonar í hlaðvarpi Eyjunnar.

Þú nefndir þarna loftslagsmálin sem Svíar hafa haft mikil áhrif á. Það er nú einmitt notað sem röksemd, Miðflokkurinn til dæmis og ýmsir þeir sem tala gegn aðild Íslands að Evrópusambandinu, er einmitt að Evrópusambandið leggi of mikla áherslu á þessi umhverfismál, á þessi loftslagsmál, af því þeir eru þeirrar skoðunar eða halda því alla vega fram að það sé bara engin loftslagsvá.

„Já, þetta er auðvitað ekki boðleg umræða. Meira og minna allir málsmetandi vísindamenn í heiminum segja það fullum fetum að þetta sé staðreynd. Þetta er auðvitað af völdum manna sem að þessar loftslagsbreytingar eru að verða. Við vitum það líka að þær hafa umtalsverð áhrif á jörðina. Við erum að sjá að öfgaveðurfar er að aukast. Þurrkar eru að aukast, sjávarborð er að hækka, jöklar eru að bráðna. Þetta hefur alvarleg áhrif á okkur mannkynið sem þurfum að búa á þessari jörð og mun hafa ófyrirsjáanlegar afleiðingar og getur haft mjög alvarlegar afleiðingar. Bara það að sjávarborð hækki um einn metra þýðir að stærstu borgir jarðarinnar eru í hættu. Þannig að það er auðvitað okkur í hag að reyna að vinna gegn þessu. Við gerum það til dæmis með því að draga úr CO2 í loftslaginu. Og það er auðvitað það sem Evrópusambandið er að tala fyrir og er að mæla með. Ég veit ekki af hverju það datt ofan í þessa popúlista að vera á móti þessu máli. Ég bara skil það ekki af því að þetta er auðvitað bara sameiginlegt hagsmunamál allra jarðarbúa.“

Jú, jú, það er nú hægt að sjá svona ákveðna fylgni. Þeir sem að afneita loftslagsvánni eru líka þeir sem afneita vísindunum þegar kemur að bólusetningum og slíku.

„Einmitt, passar. Þetta er mjög sérstakt. Ég bara skil ekki hvernig þessi sjónarmið hafa náð upp á yfirborðið í stjórnmálunum í dag. Sumir tala um samfélagsmiðlana og algóritmana og það allt saman.“

Þeir hafa áhrif. Ég hef sannfæringu fyrir því að þeir hafa áhrif.

„Já, já, og það er auðvitað líka annað sem hafði áhrif. Við sáum að það urðu ákveðin vatnaskil í Covid og þar tóku auðvitað ríkin sér mjög mikið vald og sums staðar var fólk bara lokað inni vikum og mánuðum saman og þetta auðvitað skapaði gremju og ástand sem bjó til frjóan jarðveg fyrir samsæriskenningar og andóf við ríkjandi viðhorf, jafnvel í vísindasamfélagi, því miður.“

Hægt er að hlusta á hlaðvarpið í heild sinni hér: