Samkvæmt nýjum lögum í Bandaríkjunum verður her landsins framvegis bannað að nota lifandi dýr við æfingar á þann hátt að skjóta á þau og leyfa síðan bráðaliðum að nota hin sundurskotnu dýr til að þjálfa sig í að veita skyndihjálp á vígvellinum.
Lögin tóku gildi skömmu fyrir jól en það hefur tíðkast að minnsta kosti síðan í Víetnamstríðinu að herinn nýti dýr með slíkum hætti, einkum geitur og svín.
Fjallað er um þetta í tímariti Smithsonian-stofnunarinnar en fram kemur þar að hernum verður hins vegar áfram leyft að gera ýmislegt annað við dýr svo sem að stinga þau, brenna og prófa vopn á þeim en þó með því skilyrði að dýrin verði svæfð.
Þingmaðurinn Vern Buchanan beitti sér einna mest af þingmönnum fyrir breytingunni og segir vel hægt að þjálfa bráðaliða hersins án þess að beita svo ómannúðlegum aðferðum gagnvart dýrum.
Samtök lækna hafa fagnað breytingunni sem og samtök dýraverdunarsinna sem segja þessa æfingaaðferð sem nú hefur verið bönnuð hafa falið í sér dýraníð og þetta sé mikill sigur fyrir dýr.
Sömuleiðis verður hernum bannað að stunda rannsóknir eða gera annað það sem veldur hundum og köttum sársauka en þó eru einhverjar undantekningar frá því ef aðstæður þykja varða þjóðaröryggi.
Þetta bann kemur í kjölfar þess að á allra síðustu árum hefur þrýstingur aukist um að slíkt bann yrði sett og bæði strandgæslan og sjóherinn höfðu áður komið á sams konar banni.
Það hefur ekki tekist hins vegar að upplýsa að fullu hversu mikið þessi æfingaaðferð hefur verið notuð af hernum á síðustu árum. Í stað dýranna á að nota gínur eða leikara sem klæðast þá gervum sem líkja eftir alvöru sárum, eftir sprengjur eða skothríð. Fyrrum bráðaliði í hernum segir hins vegar að það hafi verið ómetanlegt að æfa sig á lifandi dýri því það minni mun betur en gína á að það sé lífsnauðsynlegt að hafa hraðar hendur, sem sé svo spurning um líf og dauða þegar komið sé á raunverulegan vígvöll og meðhöndla þurfi særða hermenn.
