Ragnhildur er sálfræðingur með áherslu á heilsusálfræði og lærður einkaþjálfari.
Sjá einnig: Ragnhildur segir að þetta sé ekki eina leiðin til að borða hollt – Prófaðu þessa nýju nálgun í staðinn
„Það hljómar rosa vel á blaði að missa meira en kíló á viku. En það er ansi dýru verði keypt fyrir líkamann,“ segir Ragnhildur og bætir við að langflestir bæta á sig öllum þessum kílóum aftur. „Og yfirleitt gott betur og kenningar eru uppi að það megi skrifa á lækkaða grunnbrennslu vegna taps á vöðvamassa.“
Ragnhildur segir að það sé svo sannarlega ekki skortur á „sveltikúrum sem sýna fram á stjarnfræðilegan skammtímaárangur með fyrir og eftir myndum.“
„Það er jú allra söluvænlegsta auglýsingatrikkið […] En rannsóknir sýna að slík öfgakend nálgun að skera hitaeiningar við nögl hefur víðtæk neikvæð áhrif á líkamann,“ segir hún og tekur dæmi:
- „Missir á vöðvamassa vegna skorts á amínósýrum
- Minni orka til að taka á því í ræktinni
- Minni dagleg hreyfing/fjörbrennsla (NEAT)
- Lækkaður efnaskiptahraði
- Lækkun í kynhormónum
- Hátt kortisól
- Hátt streitustig vegna hungurs og næringarskorts
- Hárlos, brotnar neglur, húðvandamál
- Veikara ónæmiskerfi
- Næringarskortur
Svo ekki sé minnst á óheilbrigt samband við mat með reglulegum ofátsköstum sem hafa í för með sér skömm, samviskubit, sektarkennd og mjög neikvæða sjálfsmynd.“
Ragnhildur ræðir þetta nánar í pistlinum sem má lesa hér að neðan.
