Andri Lucas Guðjohnsen landsliðsframherji söðlaði um félag í sumar, fór frá Gent í Belgíu og til Blackburn í ensku B-deildinni.

„Þetta gerðist allt svolítið hratt og seint í glugganum líka. Það voru einhver lið sem komu til greina og ég var búinn að funda með einhverjum. En mér leist svo vel á England, deildina og þennan flotta klúbb. Ég átti gott spjall við þjálfarann og yfirmann knattspyrnumála líka,“ segir Andri við 433.is.

Andri segir það hafa verið ljóst að hann þyrfti að fara frá Gent í sumar.

„Það var það nokkurn veginn. Ég var ekki nógu sáttur með mínúturnar eftir að deildin byrjaði. Svo var nýr þjálfari sem kom inn, fékk nýjan framherja inn og það voru eiginlega skýr skilaboð, að maður myndi ekki fá sömu mínúturnar.“

Andri er auðvitað hluti af liði Íslands sem leikur gegn Aserbaísjan í fyrsta leik undankeppni HM á föstudag.

„Ég er mjög spenntur. Það er gaman að koma heim að hitta strákana og svo er geggjað veður. Það er leikur framundan sem við verðum að vinna ef við ætlum að eiga alvöru séns á að fara áfram.“