Las nýlega viðtal við Guðríði Helgadóttur (Gurrý í garðinum). Hún hafði m.a. áhyggjur af hernaði borgarinnar gegn grænum svæðum. Það má varla skína í grænt, þá skal byggja þar blokk, sbr. þéttingaráform í Breiðholti og Grafarvogi. „Ég held við séum á rangri leið akkúrat núna og ég vona að við sjáum að okkur,“ er haft eftir henni og hún vitnar í 3-30-300 regluna   ( https://nbsi.eu/the-3-30-300-rule/ ) sem nýtur aukinna vinsælda í borgarskipulagi og hljómar einhvern veginn þannig að þegar þú horfir út um gluggann heima hjá þér áttu að sjá a.m.k. 3 tré, um 30% af yfirborði þéttbýlis ætti að vera þakið gróðri og ekki meira en 300 metrar í næsta gróðurreit frá heimili þínu. Veit ekki hvort borgaryfirvöld hafa kynnt sér þessa reglu, en hafi þau gert það hlýtur eitthvað að hafa misfarist í þýðingu, því það mætti halda að hjá borginni þýddi 3-30-300 að það ættu ekki að vera meira en 3 metrar á milli húsa og 30 fermetra gróðurblettur á hverjar 300 íbúðir.

Las svo frétt um skipulag nýrra hverfa á Ártúnshöfða og Keldnalandi. Þar verða bílakjallarar undir fjölbýlishúsum bannaðir, þess í stað á að reisa miðlæg bílastæðahús, ef ég skil þetta rétt. (Þar fór einn gróðurreiturinn enn undir steypu.) Hugmyndin er að þau verði e.k. samkomuhús eða félagsheimili fyrir íbúa hverfisins og á jarðhæð verði verslanir og þjónustufyrirtæki . Sé fyrir mér auglýsingu í stigagangi blokkar á Ártúnshöfða: Bingó í bílastæðahúsinu í kvöld kl. 20:00. Magga á 13 mætir með gítarinn og það verður brekkusöngur í stigahúsinu á eftir. Gullabar opinn til kl. tvö.

Fór í kjörbúð. Við búðarkassann blasti við mynd af borgarstjóra á forsíðu Vikunnar og tilvitnun í viðtal: „Það skiptir máli að sjá spaugilegu hliðarnar á tilverunni.“ Ímynda mér að borgarstjóri hafi hlegið dátt þegar hann skoðaði skipulagstillögur Ártúnshöfða og Keldnalands.

Geri mér grein fyrir að við þurfum að hafa skipulag á hlutunum, en það má nú eitthvað á milli vera. Er þess reyndar fullviss að þau sem eru að vinna að skipulagi þessara nýju hverfa (og þéttingarreitanna) mundu aldrei sætta sig við að búa við það skipulag. Það er ætlað öðrum.

Bestu kveðjur úr óbærilegum léttleika tilverunnar.