Á flestum völlum í Bestu deild karla hefur fólk getað fengið sér ölkrús undanfarin ár, þannig hefur það verið á heimavelli Víkings í Fossvogi.

Margir stuðningsmenn félagsins voru hins vegar hissa í gær þegar búið var að skrúfa fyrir ölið. Víkingur mætti þá Aftureldingu í Bestu deild karla.

Ekki fengust frekari útskýringar á því eftir sem 433.is kemst næst en mikil umræða hefur skapast um bjórdrykkju á knattspyrnuleikjum undanfarið.

Einn af aðalmönnum Samfylkingar í borginni hefur talað hart gegn því að bjór sé seldur á leikjum. „Við erum með forvarnarstefnu. Við erum með lýðheilsustefnu hjá borginni og það er bara þannig að áfengisneysla á íþróttakappleikjum hún samrýmist mjög illa þessum stefnum okkar og við teljum að þær séu mjög dýrmætar og við eigum að finna leið til þess að komast hjá því þurfa að vera með þessa víðtæku sölu á áfengum drykkjum á íþróttakappleikjum,“ segir Skúli Helgason formaður menningar- og íþróttaráðs Reykjavíkurborgar við Vísi á dögunum.

Um þetta hefur svo skapast meiri umræða og virðist fólk skiptast í tvo hópa þegar kemur að málinu. Á flestum knattspyrnuleikjum í Evrópu er bjór til sölu en hér á landi hefur þetta notið vinsælda síðustu ár og það án mikilla vandræða.