Nýlega voru lögreglumenn við hraðamælingar á Dovrefjell í Þrándheimi í Noregi. Þeir heyrðu þá að mótorhjól nálgaðist og væri ekið ansi greitt. Þegar mótorhjólið kom nær var ætlunin að mæla hraða þess með ratsjá lögreglubifreiðarinnar en það var ekki hægt því mótorhjólinu var ekið svo hratt að ratsjáinn gat ekki mælt hraða þess.

TV2 hefur eftir talsmanni lögreglunnar að líklega hafi mótorhjólinu verið ekið á rúmlega 320 km/klst en leyfður hámarkshraði á veginum er 80 km/klst. Mesti hraði sem ratsjáin getur mælt er 320 km/klst.

Lögreglan reyndi að stöðva akstur ökumannsins í Dombås en án árangurs. Það tókst síðan að stöðva akstur hans í Sel í Innlandet. Hann var kærður fyrir of hraðan akstur út frá mælingum á meðalhraða hans á milli staðarins þar sem hann sást fyrst og þar til akstur hans var stöðvaður. Meðalhraðinn reyndist vera 218 km/klst.

Ökumaðurinn reyndist vera 25 ára Norðmaður.

Lögreglan lagði hald á mótorhjólið og farsíma mannsins til að geta aflað enn frekari sönnunargagna varðandi ofsaaksturinn.